第一站: 英國威爾斯, Brecon (零食篇)

15歲，好多人仲係一舊飯嘅時候，我踏出咗向世界出發嘅第一步！ (OK！ OK！ 係誇張咗少少，我係冇環遊世界，只係喺英美加走嚟走去啫！)



繼續，第一站去英國南威爾斯，一個叫做Brecon嘅小鎮，細到阿媽都唔認得，間學校都係，細到暈！ 一個幾鄉下嘅地方，有次搭的士去火車站，中途有幾隻羊阻住我地架的士添呀，係咪好正呢？嗰段日子好唔開心，homesick啦，啲鬼妹好衰啦；記得有次Brecon放啲我個頭仲大過佢嘅煙花，有個鬼妹問我香港有冇，嘩我幾藐佢呀，不過嗰陣時英文差唔識寸佢，如果唔係？！唉算啦，都係繼續，啲修女又騎呢啦，幾乎一無是處, 不過我係由呢個地方開始學習烹飪，嗰時好有挫敗感，因為個老師見到我煮出嚟嘅賣相後，佢唔敢試。唉 ......

所以嗰陣時唔鍾意煮嘢食，呢個女人，就係咁差啲毁咗我當時仲未有嘅夢想 (你唔好而家先至嚟問我個夢想係乜呀，絕交架！)

嗰時唔鍾意煮但係幾鍾意嗰度嘅食物，尤其係零食！頭先喺Marks and Spencer見到三款我當時都幾鍾意食嘅零食，有Onion rings啦，Prawn cocktail shells啦同埋Potato rings！不過唔知係咪老咗，心情唔同咗定因為唔同牌子呢，都係覺得Brecon買嗰啲好味啲！

望住幾包零食，諗番好多以前Boarding school嘅生活，好奇怪，我記得嗰時係唔開心，但係就唔記得番嗰種唔開心嘅感覺，原來時間真係可以沖淡一切！

下次講吓Boarding school食乜嘢！