爸爸的牛尾湯

唔鍾意食牛肉, 但係牛牛嘅其他部位就覺得好好味。 今晚就煲咗牛尾湯。

牛尾湯給我的童年回憶係得個「咸」字！小時候爸爸好鍾意買 Knorr Oxtail Soup煲俾我地飲, Knorr唔同Campbell 湯, Knorr係湯粉! 爸爸鍾意嘅程度都幾癲吓, 每個星期都要飲, 成件事最恐佈係佢煲嘅時候通常都攪唔勻, 到我地飲落肚嘅時候就會咬到一舊舊未溶得哂嘅粉末, 唉, 爸爸的烹飪技術真係......唔係幾得咯!

大個咗之後至知真正嘅牛尾湯都唔係咁嘅, 超揾笨! 於是炮製屬於自己嘅牛尾湯, 最重要係我可以唔落Tomato paste呀, 至憎Tomato paste!

我嘅牛尾湯主要為懶人而設, 材料包括主打嘅牛尾啦, onion, carrot, tomato, celery, 分量隨你鍾意, 所有材料「劈」 哂落個瓦煲度, 加一塊Bay leave & 一粒OXO牛肉湯粒, 慢火便1.5個小時就得架啦! (咁當然啲牛尾要氽水啦, 呢啲指定動作唔洗教啦下話!)

最後順帶一提, 用瓦煲啦, 入味好多架, 1-2小時就煲完, 真空煲同佢煲出嚟嘅味道爭九條街架!